Il-Malta International Business Awards bl-aqwa suċċessi ta’ kumpaniji f’Malta fis-swieq barranin
Source: One News
Date: 23/11/2019
Il-kisbiet ta’ negozji Maltin u bbażati f’Malta tal-prodotti u s-servizzi tagħhom fuq livell internazzjonali ġew iċċelebrati fit-tieni edizzjoni tal-Malta International Business Awards organizzata minn Trade Malta. Lejla fejn l-istejjer ta’ kumpaniji li bdew minn Malta iżda li kibbru lil hinn minn xtut lokali kienu rikonoxxuti. Tnax-il kumpanija li ddistingwew ruħhom fl-isforzi internazzjonali tagħhom ġew ikklassifikati bħala finalisti għall-aktar stejjer ta’ ispirazzjoni. Ir-rebbieħa tal-aqwa kumpanija fl-esportazzjoni għal-2019 kienet AquaBiotech Group.
Il-Ministru għall-Affarijiet Barranin u l-Promozzjoni tal-Kummerċ Carmelo Abela indirizza l-attivita’ u faħħar l-ambizzjoni u l-kuraġġ tal-intraprendituri Maltin fuq livell globali. Huwa ħabbar li Malta qed tħares lejn l-Afrika bħala sieħba kummerċjali. Qal kif dan huwa konformi mal-fehmiet u l-interessi tas-settur privat lokali li qed ifittex li jesplora lejn swieq barranin.
Huwa ħabbar li f’dan ir-rigward il-Ministeru bħalissa qed jaħdem fuq l-ewwel Strateġija ta’ Malta dwar l-Afrika u li fl-ewwel nofs tas-sena 2020, missjoni kummerċjali fil-Gana se tkun immexxija mill-Ministeru responsabbli mill-Promozzjoni ta’ Kummerċ. Missjoni kummerċjali lejn ir-Rwanda se sseħħ ukoll u se taħbat mal-Laqgħa tal-Kapijiet tal-Gvern tal-Commonwealth li ser isseħħ fir-Rwanda f’Ġunju li ġej. L-Onor. Abela iddikjara li l-Ministeru li huwa jmexxi se jirċievi delegazzjoni tal-kummerċ mill-Etjopja, bħala parti minn impenn kummerċjali bejn Malta u l-Afrika Sub-Saħarjana.
L-Onor. Abela tkellem dwar il-ħidma li għaddejja mill-Ministeru għall-Affarijiet Barranin u l-Promozzjoni tal-Kummerċ biex tissaħħaħ ir-rappreżentanza diplomatika ta’ Malta fil-kontinent Amerikan, Afrikan u Asjatiku. “Il-ftuħ ta’ missjonijiet diplomatiċi ġodda f’pajjiżi fejn Malta għad m’għandhiex rappreżentanza diplomatika jpoġġina f’pożizzjoni aħjar biex nassistu lill-kumpaniji privati Maltin biex imorru fuq livell internazzjonali”, qal Abela.
Huwa żied li l-Ministeru se jkun qed iniedi proġett pilota ta’ commercial attaches mal-iżjed Ambaxxati Maltin f’pajjiżi differenti li għandhom potenzjal kummerċjali. Dan ser ikun ta’ benefiċju għal kumpaniji bbażati f’Malta li jixtiequ jinvestu f’pajjiżi partikolari.
Matul is-serata ingħataw diversi premjijiet għall-eċċellenza ta’ kummerċ fuq livell internazzjonali. Ir-rebbieħa l-oħra kienu:
Premju tal-Kategorija tan-Negozju Żgħar: Pet Nutrition House
Premju ta’ Kategorija ta’ Negozju Daqs Medju: AquaBioTech Group
Premju tal-Kategorija tas-Swieq Emerġenti: Mediterranean Ceramics
Kategorija tal-Għoti tal-Innovazzjoni: Thought 3D
Premju ta’ Kategorija Potenzjali Għolja: Stargate Studios Malta
Premju tal-Kategorija Esportatur onlajn: Free Hour
Is-serata kienet indirizzata minn kelliem mistieden internazzjonali Dr Fons Trompenaars. Huwa rikonoxxut madwar id-dinja għax-xogħol tiegħu bħala konsulent, kelliem ta’ motivazzjoni u awtur ta’ diversi kotba dwar suġġetti marbuta mal-kultura u n-negozju. Huwa għal iżjed minn 30 sena huwa offra assistenza lill-mexxejja ta’ Fortune 500 sabiex jindirzzaw u jsolvu d-dilemmi kummerċjali u kulturali biex iżidu l-effettività u l-prestazzjoni tagħhom fuq livell globali.
Dr Trompenaars huwa kklassifikat fil-Thinkers50 2011, 2013 u 2015 bħala wieħed mill-aqwa ħassieba għan-negozju. Matul il-ġurnata, Dr Trompenaars kellu seminar ta’ taħriġ ma’ rappreżentanti minn kumpaniji Maltin. Dan kien organizzat minn Trade Malta u l-Kamra tal-Kummerċ ta’ Malta.
L-HSBC kien is-sieħeb strateġiku tal-Malta International Business Awards 2019.